Балалық шақ елінің сиқыршылары

Шахан кентіндегі №8 кітапхана-филиалында №2 ЖББМ-нің 3 «В» сынып оқушыларына арналған «Балалық шақ елінің сиқыршылары» атты әдеби бенефис ұйымдастырылды. Іс-шара қазақстандық балалар әдебиетінің көрнекті өкілдері — Қастек Баянбаевтың 90 жылдығы мен Асқар Дуйсенбиевтің 95 жылдығына арналды. Кездесу барысында оқушылар ақындардың өмір жолы мен шығармашылығы туралы тың мәліметтер алып, олардың балаларға арналған туындыларының тәрбиелік мәнін түсінді. Шара барысында балалар ақындар әлеміне саяхат жасап, олардың өлеңдері арқылы мейірімділік пен ізгілікке толы ерекше атмосфераны сезінді. Кітап көрмесіне ұсынылған өлең жинақтары оқушылардың қызығушылығын оятып, олар шығармаларды ықыласпен парақтап, өзара талқылады. Балалар мерейтой иелерінің өлеңдерін мәнерлеп оқып, әр жолдың мағынасын ашуға тырысты. Әдеби ойындар мен викториналар оқушылардың белсенділігін арттырып, олардың білімдерін шыңдай түсті. Әсіресе, ақындардың жұмбақтарын шешу кезеңі ерекше көңіл күй сыйлап, балалардың ойлау қабілеті мен тапқырлығын дамытуға ықпал етті. Іс-шара соңында оқушыларға ақындардың шығармаларын оқуды жалғастырып, кітаппен достықты нығайту ұсынылды. Мұндай кездесулер жас ұрпақтың әдебиетке деген қызығушылығын арттырып, рухани дамуына жол ашады.