Менің әдеби жаңалығым

Шахан кентіндегі №8 кітапхана-филиалында жас оқырмандарға арналған «Менің әдеби жаңалығым» атты қызықты әдеби квиз өтті. Іс-шара балаларға жарқын әсер сыйлап, кітап оқуға деген қызығушылықтарын арттырды. Қыздар мен ұлдар көңілді сайысқа белсене қатысып, түрлі әдеби тапсырмалар арқылы өз білімдері мен тапқырлықтарын көрсетті. Қатысушылар «Ғажайып жұмбақтар» кезеңінде жұмбақтардың шешуін тапса, «Халық даналығының білгірлері» бөлімінде мақал-мәтелдер бойынша білімдерін сынады. «Сенемін – сенбеймін» ойынында өздерінің зеректіктерін байқатып, «Бұл кім, тапшы?» және «Жұмбақтар сандығы», «Ертегі – өтірік, бірақ астарында ғибрат бар» байқауларында тапсырмаларды сәтті орындады. Қызықты кітап саяхаты барысында жас оқырмандар сүйікті ертегілері мен шығармаларын еске түсіріп қана қоймай, жаңа әдебиеттермен танысып, өздері үшін тың әрі қызықты кітаптарды ашты. Іс-шара балалардың кітап оқуға деген ынтасын арттырып, әдеби дүниетанымдарын кеңейте түсті.