Халық дәстүрі ізімен
16 наурыз күні Шахан кентіндегі №8 кітапхана-филиалы әлеуметтік желілерде оқырмандар үшін келе жатқан Наурыз мерекесіне арналған «Халық дәстүрі ізімен» атты мерекелік дәстүрлер калейдоскопын өткізді. Кітапханашы қонақтарды халқымыздың бай салт-дәстүрлері мен әдет-ғұрыптары әлеміне қызықты саяхат жасауға шақырды. Іс-шара барысында Наурыз мерекесінің тарихы мен маңызы, оның әртүрлі өңірлерде қалай тойланатыны, сондай-ақ осы шуақты көктем мерекесімен байланысты салт-дәстүрлер мен әдет-ғұрыптар туралы кеңінен баяндалды. Ұлттық мерекелік дастархан дәстүрлеріне ерекше назар аударылды. Тыңдаушылар әрбір шаңырақта дайындалатын мол әрі берекелі дастархан туралы білді. Сонымен қатар мерекелік тағамның басты нышаны саналатын Наурыз көженің шығу тарихымен танысты. Кітапханашы бұл тағамның мағынасы мен оның құрамына кіретін жеті түрлі дәмнің мәнін түсіндірді. Бұл жеті дәм молшылықты, ырыс-берекені, амандықты және өмірдің жаңаруын білдіреді. Сондай-ақ мереке күндері ежелден өткізіліп келе жатқан ұлттық ойындар туралы да айтылды. Бұл ойындар адамдарды жақындастырып, барша халықты бірлікке, татулыққа шақырады. Іс-шара соңында кітапханашы барша қатысушыларды келе жатқан Наурыз мерекесімен құттықтап, зор денсаулық, әр шаңыраққа бақ-береке, молшылық және жүректерге көктемнің жылы лебін тіледі.
