Жердің көркі – гүлдер

22 ақпанда Шахан кентіндегі №8 кітапхана-филиалында «Эко» клубының мүшелеріне арналған «Жердің көркі – гүлдер» атты экологиялық ассорти өткізілді. Іс-шара кітапханашының ғаламшарымыздағы өсімдіктер әлемінің сан алуан әрі таңғажайып түрлері туралы танымдық әңгімесімен басталды. Жас экологтар гүлдердің Жер экожүйесіндегі рөлі жайында пікір алмасты. Әсіресе, көктемнің алғашқы гүлдеріне және Қызыл кітапқа енгізілген басқа да өсімдіктерге ұқыпты қарау мәселесіне ерекше назар аударылды. «Гүлдер калейдоскопы» атты шолу барысында балалар бөлме гүлдері мен табиғатта өсетін өсімдіктер туралы әдебиеттермен танысты. Білімдерін бекіту мақсатында «Гүлдер жұмбағы» атты викториналар ұйымдастырылды. Балалар сипаттамасы мен аңыздары бойынша бақша және дала гүлдерінің атауларын тапты. «Ертегідегі гүлді тап» викторинасында әдеби шығармаларда кездесетін гүлдерді еске түсірді. Сондай-ақ, оқушылар үшін «Жасыл терезе ернеуі» атты шеберлік сағаты өткізілді. Кітапханашының жетекшілігімен қатысушылар бөлме гүлдерін құмыраларға отырғызуға қатысты. Әр бала өзін нағыз бағбан ретінде сезінді. Кездесу барысында балалар үй өсімдіктеріне күтім жасау жөнінде жаңа білім мен тәжірибе алды.